حوزہ نیوز ایجنسی کی رپورٹ کے مطابق، اصغریہ اسٹوڈنٹس آرگنائزیشن پاکستان خیر پور، کراچی اور سندھ ڈویژن کی جانب سے عالمی یوم القدس کی مناسبت سے سیمنار کا انعقاد کیا گیا۔
سیمینار سے خطاب کرتے ہوئے مقررین نے کہا کہ یوم القدس فلسطین کا نہیں بلکہ اسلام کا دن ہے اور القدس کی نجات کا واحد راستہ مقابلہ اور استقامت ہے۔
مقررین نے عالمی سطح پر منائے جانے والے یوم القدس کو سرکاری طور پر منانے اور ملک بھر میں اسرائیل کے سلیپر سیل کے خلاف سخت سے سخت کاروائی عمل میں لانے کا مطالبہ بھی کیا۔
مقررین نے کہا کہ فلسطین پر قائم کی جانے والی صہیونی ریاست اسرائیل ایک غاصب اور ناجائز ریاست ہے اور پاکستان میں اسرائیل کے لئے کام کرنے والے عناصر اسکولوں اور مختلف مقامات پر غاصب صہیونی ریاست اسرائیل کے لئے نرم گوشہ پیدا کرنے کی گھناؤنی سازشیں کر رہے ہیں اور پاکستان کی نظریاتی بنیادوں کو کھوکھلا کرنا چاہتے ہیں۔
سیمنار سے خطاب کرتے ہوئے مقررین نے مزید کہا کہ پاکستان میں اسرائیل کے لئے کام کرنے والے ملک دشمن عناصر کو آزاد نہیں چھوڑا جا سکتا تاہم ان کا ہر سطح پر راستہ روکنے کی کوشش جاری رکھیں گے۔
مقررین نے باہمی اتحاد کو فروغ دینے اور مسئلہ فلسطین کو اجاگر کرنے سمیت عالمی صہیونی سازشوں کا مقابلہ کرنے کے لئے باہمی اتحاد پر زور دیا۔
